იტალიის ჩრდილოეთში, ტურინთან ახლოს მინიატურული სოფელი ვიგანელაა 200-კაციანი დასახლებით. მას ხუმრობით ციმბირს უწოდებენ, რადგან ნოემბრიდან თებერვლამდე აქ მზე თითქმის არასოდეს დანათის. სხივების სოფლამდე მიღწევას მთები ”ბლოკავენ”. თუმცა, იტალიელებმა ეს პრობლემა თავისებურად გადაჭრეს – გადაწყვიტეს მთის წვერზე, 870 მეტრის სიმაღლეზე დაემონტაჟებინათ უზარმაზარი სარკე, რომელიც არეკლილ მზის სხივებს სოფლისკენ მიმართავდა.
გამოთვლების შედეგად დადგინდა, რომ ამრეკლავის ფართობი მინიმუმ 40 კვ მ უნდა ყოფილიყო, პროექტის ღირებულება კი 100 000 ევროს შეადგენდა.
საკმაოდ ძვირად ღირებული სიამოვნებაა სოფლის მცხოვრებლებისთვის. მაგრამ მას მერე, რაც ამ წამოწყებაზე ჟურნალ-გაზეთები ალაპარაკდნენ, გამოჩნდნენ სპონსორები.
ფოლადის ფურცელი ამრეკლავი ზედაპირით 2006 წელს დაამონტაჟეს. ის კომპიუტერული მართვით არის უზრუნველყოფილი, რომლის წყალობითაც სარკე მზეს ”კუდში დასდევს”, ანუ მის კვალდაკვალ ისე ტრიალებს, რომ მთელი დღის განმავლობაში ანათებს სოფელს.
ვიგანელას მოსახლეობის ცხოვრების წესი შეიცვალა. ზამთარში არ ჩქარობენ წირვის შემდეგ დაშლას, მთავარ მოედანზე დროს ლაყბობაში ”მზის” ჩასვენებამდე ატარებენ.